[食評] 瑰麗酒店抵食餐廳 – HOLT’s Cafe

[食評] 瑰麗酒店抵食餐廳 – HOLT’s Cafe

話說K11開左間瑰麗酒店，但係住一晚價錢差唔多成HKD5000一晚，即使用Klook 住宿及餐飲優惠都要HKD4439，依個價錢可以去一轉泰國旅行，所以唔係太捨得。反而我對佢個 HOLT’s Cafe有興趣，因為佢個價錢跟K11商場的大部份餐廳差不多，當然會高價錢過一些平價餐廳，但依間野好處就係坐得舒服以及有5星級酒店的服務，無論中午或晚上去食都係好抵玩。 依間餐廳位置唔易揾，唔識可以問職員，佢地好樂意答你。餐廳門口是一間餅店 – Butterfly，十分之華麗。 再行入去就係餐廳，職員會問你係唔係住客，個人唔太明白原因，可能最後酒店check out一次過埋單或者住客有優惠。 今次叫左個乾炒牛河、日本黑豚肉豬扒、以及蝦多士，全部都好好味。 個人最鐘意就係下面依個黑豚肉豬扒，雖然價錢$270，但絕對值得，因為佢係用燒烤方法去做，骨附近既肉燒到好脆口，加上佢個汁同波菜，絕對係一絕，你唔會係屋企做到。 其它野食就唔多講，因為豬扒已經佔有我的心。順帶一提，佢地會提供餐前面包，而且好暖，食落好正，最後埋單$547!