話說筆者超級鍾意食牛筋腩, 尤其是牛筋, 但係每次去到啲餐廳，佢都係畀得嗰兩條牛筋我, 完全頂唔到癮。所以今次經過街市，即刻走去凍肉鋪買條牛筋返嚟自己慢慢整, 慢慢食。一於自家制牛筋腩米粉。 其實好多人都話整牛筋好麻煩, 又要炆腍佢又要煮到佢入味，但係我個人嘅做法就非常簡單就係三個字: 一鑊熟。 首先我就喺街市嘅凍肉鋪買咗啲牛筋返嚟解凍, 然後洗左佢再連同薑蔥去一齊煲熟佢10分鐘。由於我自己懶到極點, 唔鍾意睇火, 所以就用電飯煲(係一個好普通嘅電飯煲，二百零文左右)，閂埋個蓋就將去煲熟, 再慢慢炆。 當然做法有少少秘訣: 因為你將嗰條牛筋不斷狂滾嘅話就會令到佢變得林癟癟完全冇彈口，要做到有彈口就唔可以死爛滾，炆到過曬火成煲嘢就唔使要喇。 所以唔可以撳遠個掣就由得佢自己滾，首先就要等到佢差唔多滾起然後熄左佢, 等佢慢慢炆幾個字然後再開返個電飯煲，再慢慢炆多四個字, 如是者重複以上步驟, 大概炆兩個鐘就完全淋曬喇。如果你驚唔淋你自己用支叉叉入去。叉得入就係淋, 叉唔入就要繼續煲, 好簡單。 煲完之後你會發現成煲牛筋水都係好杰撻撻嘅，全部都係骨膠原但係我會倒左佢算數喇。跟住過冷河再再倒入滷水汁去慢慢浸佢, 每浸10分鐘就滾去10分鐘。如是者重複呢個步驟，一個鐘噉就令到成條牛筋上曬色好靚。 由於齋食牛筋好似有啲齋所以我又去咗超市買咗一盒整好咗嘅即食牛腩，講明香港制造, 打開之後發現分量真係好少。不過好就好在佢d肉夠腍夠入味, 都幾好食。 所以將佢哋倒埋落去我煲滷水牛筋度一齊滾十分鐘，跟住放上去米粉度就可以食得喇。 味道比出邊食更加好而且可以無限加牛筋，價錢亦都好實惠! 因牛筋只係$30已經夠我食三四餐喇。