I'm Leo Cheung
近期疫情嚴重，唔想日日留喺屋企整野食，想出街但又驚住多人會感染，最後簡左去跑馬地食 壹玖捌叁，貪佢有空間，枱與枱之間都隔好遠，而且是D類食肆，一家3口食野唔洗分開坐隔住黎食。 大門入口有個長樓梯，新年期間去裝修十分好看。而且招牌夠大，好有氣派。 入到去裏面即刻有枱，唔洗等，而且坐得好舒服，又唔嘈。 坐低後用平板點菜，但點完唔代表落左單，佢其實只喺用個平板菜單比你睇埋圖片，最終都要 壹玖捌叁 經員工人手去落單。 叫得 壹玖捌叁 咁有 HISTORY ，當然亦有傳統的 menu 比你睇。 最後點左3個點心、1個菜同埋一個甜品。 最靚應該喺個3色小籠包，不過皮有點厚! 其它點心足料夠又好味，蝦夠彈牙，正! 炒軟殼蟹都好味，炒得好有火喉，配埋d蔥好好食。 最後埋單五百幾蚊，以這個食物質素黎講算抵食!
今日天氣得果13度，怕凍的屠文使者緊喺要圍爐食番D熱野，但喺我又唔想打邊爐，因為曾經有邊爐家族的前科，前車可鑑! 所以最後決定食韓燒! 經過我詳細搜查之後 (我唔用openrice，原因好簡單，因為我中過好多打手好評的伏!)，鐘意海景的我決定食依間 濟洲燒肉食堂 – 北角分店! 依間野位於北角最新的大型商場 – 北角匯，十分之好行! 濟洲燒肉食堂位於二樓，上到上唔洗等，立即可以入座，並被自動安排入座海景位 (好多餐廳都將客人安排左D唔好既位先，留番D好位到最後)，值得一讚! 入座後員工即時幫我地上4小碟同菜、沙律等等，另外仲幫我地倒蛋漿同芝之碎等等，服務算OK。 之後小編點左一碟牛一碟豬，詳情唔講，總之牛好食過豬啦! 埋單都喺 $455, 三個人食連野飲，每個人都喺百幾蚊左右，又有海景，成個人relax晒，CP值超高!
話說想試食呢隻面好耐, 但係無論喺759或者喺超級市場見到都係好貴, 成$60一包，就算俾我喺臺灣見到平少少我都唔係好捨得買。不過今日終於俾我等到, 喺超市見到佢哋將呢包面列為特價貨品，價錢減咗一半, 只需要$29就可以買到, 所以我即刻攞起一包沙茶拌面畀錢買。 Kiki 面好唔好食? 返到屋企即刻影張相, 有圖有真相, 一包裏邊有五小包, 每包面有一包醬料。煮法好簡單, 只需要用水煮三分鐘然後加埋佢哋嘅醬料, 撈埋一齊, 搞掂食得。 食咗落肚之後, 第一啖已經發現佢味道同其他嘅台式即食拌面唔同, 其他臺式拌麵都好油好滯, 但係佢就冇呢種感覺，而最主要嘅分別就係佢個醬汁做得非常惹味, 亦都係我覺得佢貴嘅原因。不過留意番, 我講的只是醬汁味道, 麵底本身同其他嘅牌子郁乜嘢分別。 kiki面值得買嗎？ 試完之後你問我會唔會繼續買, 我會答你唔會, 因為純粹為咗個醬汁而花費$60去買呢個面(特價另計), 我覺得不如直接出街食好過啦! Kiki面背後大老闆 舒淇投資嘅KiKi麵，賣點喺純手工同非油炸, 更一度喺台灣賣斷市, 主要原因是因為明星效應同埋面食喺台灣主要日常食品, 對於學生及租屋旅黎講絕對喺恩物。所以之後亦有唔少明星跟風, 如曾國城的曾伴面。
![[食評] Chateraise 蛋糕開箱](https://imleocheung.com/wp-content/uploads/2020/06/20200510_134650_HDR-800x450.jpg)
Chateraise 嘅甜品一直都好想試, 因為佢標榜嘅係日本直送，尤其是士多啤梨相關嘅甜品。唔使飛過去日本都有佢哋嘅水果食, 就算價錢貴少少都冇問題。加上佢嘅價錢其實同 Lady M平少少，所以好想試下究竟佢有幾好味。 所以今次買咗一個焦糖千層蛋糕以及士多啤梨蛋糕，再加埋佢哋嘅芒果布甸，一試就知龍與鳳。 喺甜品店裏邊服務員態度都算有禮, 雖然冇日本嗰啲服務員咁好, 多謝前多謝後，但係喺包裝上絕對有過之而無不及。 首先佢會用個紙盒幫你裝住兩件蛋糕，然後再加埋一個冰包等你凍住的食品可以保持恒溫嘅狀態。最後再用個1靚靚紙袋嚟包住個紙盒。 首先, 以千層蛋糕嚟講佢絕對冇 Lady M 咁好食呢啲真係層層分明佢, 就好似將所有嘢擗埋一齊，個口感質感就唔夠分明層次分明, 有點扣分。 至於士多啤梨蛋糕就同普通喺美心買嘅差唔多, 士多啤梨都係一般般, 又冇話特別甜，所以我估計佢唔係用最好嘅日本士多啤梨整, 而係用一啲比較低級似檔嘅日本士多啤梨去整呢個蛋糕。 反而個布甸就有驚喜, 食落去真係啖啖芒果肉, 同喺759或者百佳買嘅布丁完全有好大分別, 所以絕對值得用十幾文去買呢個布甸。 整體嚟講佢個樣都ok, 但係始終呢間鋪頭嘅選擇並不多, 所以有陣時真係好難揀。只會喺冇選擇之下嘅情況而埋佢哋嘅蛋糕。
一直以嚟去麥當勞食嘢我都係只食包餐, 我唔會去揀麥樂雞餐因為麥樂雞實在太亁, 好似食緊一嚿硬掘掘嘅擦膠噉。但係最近嘅麥炸雞令我對麥當勞嘅烹調手法有所改觀。估唔到食落去係可以撳滑嘅，而且仲可晉身成為麥當勞餐第十個常餐！究竟麥當勞嘅麥炸雞點解可以咁滑嘅哩? 小編就為咗呢樣嘢做咗大量嘅研究, 並且去麥當勞嘅職員查詢過。今次就為大家解答一下啦。 首先, 麥炸雞有兩塊, 一塊係雞脾另外一塊係雞上髀。當中以雞髀係最滑最 juicy。小編查證過, 原來麥炸雞並非即時炸啲, 但係佢出嚟嘅時候食落口真係好正，噉究竟係點解可以做到滑得嚟又有即炸嘅效果哩？ 點解麥炸雞可以噉滑 麥炸雞嘅秘密就係用蒸嘅方法去煮。麥當勞會喺食物工場嗰度將雞蒸熟, 而蒸嘅方法仲要係用保濕方法去蒸, 並非傳統嘅白切雞噉嘅蒸法, 咁可以確保肉汁一滴都唔會流失, 所以食落去特別滑，然後就送去麥當勞門市, 而麥當勞門市就會在收到柯打嘅時候，先至將佢落鑊炸90秒，並且喺20秒內即時送到客人手中。 雖然麥炸雞同麥樂雞都係用冰鮮雞去煮, 但係由於做法唔一樣大家出來嘅效果係好大分別，而家麥樂雞賣25元, 而麥炸雞就畀佢買多十蚊亦都反映到呢個煮法嘅成本多十蚊。但係筆者覺得仍然很抵食, 因為比起傳統韓國炸雞嘅味道更加好味, 雖然份量係少左啲, 但係35蚊嚟講連埋嘢飲一個餐，喺香港絕無僅有。 自制麥炸雞? 聰明既你可能會問, 咁我可唔可以自己係屋企整到依種效果? 我可以答你唔得。因為佢第一個步驟係用保濕蒸法, 咁樣會用特別工具去做, 所以網上流傳嘅氣炸方法喺唔可行的。