食評: 韓國健康炸雞之首選 – Dodam Chicken

好耐冇寫過食評啦! 由於疫情關係, 好耐都冇出過食餐勁, 所以今個星期決定出去銅鑼灣 Dodam Chicken 食餐好既!

好耐冇去過銅鑼灣, 一出到就估唔到變得咁多, 周街都係吉舖, 雖然人流一樣多, 但大家都戴上口罩, 完全感覺唔到銅鑼灣以前既熱鬧開心既感覺。

今次去食既係位於利舞台既 Dodam Chicken! (地址: 銅鑼灣波斯富街99號利舞臺廣場18樓A號舖)。

一入到去餐廳個裝潢非常之有韓國氣氛, 雖然唔算得上豪華, 但係有格外嘅韓式情調,餐廳前後各有一部電視, 一直播住不同的韓國熱門人氣跳舞組合的 MV。

細看之下餐廳的餐紙都有很細心的布局, 例如在紙的下方有教大家點樣講一些簡單的韓文, 仲要中英對照。好讓大家在等待美食的時候, 同時間亦不會覺得悶, 打發一下時間。

Dodam Chicken 餐廳

小編一坐低就當然叫雞食。因為餐廳嘅招牌菜就是炸雞。呢度嘅炸雞同出邊嘅韓式炸雞店有乜嘢唔同? 喺未食過唔同餐廳嘅炸雞之前, 小編一直覺得都係將隻雞放喺啲油裏邊, 炸完然後攞返出嚟,間間餐廳應該唔會有乜嘢特別唔同。但係經過小編多年來食炸雞嘅經驗發現原來炸雞都係一門學問。

簡單嚟講長話短說這間 Dodam Chicken 餐廳嘅炸雞係比其他餐廳冇咁油膩! 佢炸出嚟嘅雞食完都唔會有一種好”滯”嘅感覺,而其他餐廳嘅炸雞食兩塊就已經好滯, 同埋大多數嘅炸雞店都係將嗰隻雞,不斷沾炸粉令雞嘅形狀看似好大只, 好抵食噉樣。但係實際情況,就當然唔係噉啦。

Dodam chicken 招牌原味炸雞

由上圖可以見到餐廳嘅炸雞睇起上嚟係比較乾身, 亦都唔似其他炸雞店噉,影相嘅時候有一種閃閃發亮嘅美感。但係小編就係鍾意呢一種嘅感覺, 因為佢將雞嘅油脂完全炸曬出嚟令到大家食嘅時候唔會有一種油膩嘅感覺,所以係會比較健康。

另一方面, 雞嘅裏面即係肉亦都可以充分噉鎖緊肉汁。小編相信廚師應該喺挑選雞嘅品種有一種特別嘅要求, 唔係乜嘢雪藏雞都可以走嚟入貨。

但係佢點樣煮小編就不言而之。總之食落去啲雞肉係好有雞汁, 同埋肉嘅質地係比較滑嫩, 唔會有”鞋雜雜”嘅感覺。再加上這隻炸雞仲配兩種醬汁, 一種係韓式辣椒醬, 另一種就是芥辣醬,配埋隻雞簡直係一絕。

叫咗一碟健康嘅炸雞, 小編當然要叫返一個邪惡嘅美食啦! 今晚見到餐廳新出一款炸薯條,雖然要成100蚊以上, 但係睇落去個賣相非常吸引, 所以都叫咗一客。

簡單嚟講佢就係將一個提子包中間刮出空間, 然後倒入熔岩芝士,再喺麵包嘅周圍鋪上密密麻麻嘅薯條同埋炸蕃薯條。就算四個人食都唔會食得曬。不過芝士嘅吸引力真係不容忽視, 就算好飽都想不斷將佢放入口。

兩碟餸連埋加一, 一共300多元雖然價錢有點貴但是都值得。以這個質素嚟講又要喺銅鑼灣呢個咁熱門嘅地點, 老闆始終都要交貴租, 所以都係嚟支持一下香港嘅優質飲食。若果星期一至五去食lunch會抵好多, 因為佢有set lunch!

相比之下荃灣海之戀嘅呢間餐廳就真係唔好試,價錢又貴, 又唔好味, 不過都唔知點解咁多香港人走去大排長龍, 真係人排佢又排囉。

屠文使者

Leave a Reply

Your email address will not be published.

Back to top